బొల్లారం, ఫిబ్రవరి 06(ప్రజాస్వరం):
బెల్ట్ షాపులో మద్యం అమ్మి అధిక లాభాలు పొందాలనే ఉద్దేశంతో అక్రమంగా మద్యం తరలిస్తున్న వ్యక్తిని ఐడిఏ బొల్లారం పోలీసులు పట్టుకున్నారు. చాకలి మహేష్ వైన్స్ షాపుల నుంచి మద్యం తీసుకొని అధిక ధరకు విక్రయించేందుకు ప్రయత్నిస్తున్నాడని నమ్మదగిన సమాచారం మేరకు పోలీసులు వాహనాల తనిఖీలు చేపట్టారు.
ఈ తనిఖీల్లో నిన్న గురువారం నాడు మహేష్ తన స్విఫ్ట్ కారులో అక్రమంగా మద్యం తరలిస్తుండగా పట్టుబడ్డాడు. కారులో మొత్తం 78 లీటర్ల బీరు (రూ.19,500 విలువ) మరియు 26.640 లీటర్ల విస్కీ (రూ.29,304 విలువ) కలిపి మొత్తం 104 లీటర్ల మద్యం (216 బాటిళ్లు), మొత్తం విలువ రూ.48,804 స్వాధీనం చేసుకున్నారు.
అక్రమంగా మద్యం తరలించిన స్విఫ్ట్ కారును పోలీసులు సీజ్ చేసి, నిందితుడిపై కేసు నమోదు చేశారు. ఎలాంటి అనుమతులు లేకుండా మద్యం అమ్మినా, కలిగి ఉన్నా అట్టి వ్యక్తులపై చట్టపరమైన కఠిన చర్యలు తీసుకుంటామని ఐడిఏ బొల్లారం ఇన్స్పెక్టర్ మూల రవీందర్ రెడ్డి హెచ్చరించారు.
