తూప్రాన్‌లో సోమవారం నుంచి ఘనంగా మల్లన్న జాతర

మల్లిఖార్జున స్వామి కల్యాణం – రేణుకా ఎల్లమ్మ కళ్యాణానికి భారీ ఏర్పాట్లు

భక్తులతో కళకళలాడనున్న తూప్రాన్ ఆలయ ప్రాంగణం

తుమ్మెట శ్రీనివాస్ యాదవ్

తూప్రాన్, మార్చి 13 (ప్రజా స్వరం )
పూర్ణరాజు గౌడ్ ప్రతినిధి

మెదక్ జిల్లా తూప్రాన్ పట్టణంలో స్వయంభువుగా వెలసిన శ్రీశ్రీశ్రీ మల్లిఖార్జున స్వామి ఆలయంలో నిర్వహించనున్న మల్లన్న జాతర బ్రహ్మోత్సవాలకు ఏర్పాట్లు జోరుగా సాగుతున్నాయి. యాదవ సంఘం నాయకుడు తుమ్మెట శ్రీనివాస్ యాదవ్ ఆధ్వర్యంలో ఈ వేడుకలను అత్యంత వైభవంగా నిర్వహించేందుకు ఆలయ నిర్వాహకులు విస్తృత ఏర్పాట్లు చేస్తున్నారు. జాతర ప్రారంభానికి ముందు ఆదివారం రోజున పవిత్ర గంగా నదికి వెళ్లి ప్రత్యేక పూజలు నిర్వహించి, పవిత్ర గంగాజలం తీసుకువచ్చి ఆలయ ప్రాంగణంలో సంప్రోక్షణ కార్యక్రమం నిర్వహించి జాతర బ్రహ్మోత్సవాలకు అంకురార్పణ చేయనున్నట్లు నిర్వాహకులు తెలిపారు. ఈ కార్యక్రమంతో ఆలయ ప్రాంగణం భక్తి పరవశంతో నిండిపోనుంది.జాతర కార్యక్రమాల్లో భాగంగా సోమవారం శ్రీశ్రీశ్రీ మల్లిఖార్జున స్వామి వారి దివ్య కల్యాణ మహోత్సవం అత్యంత భక్తిశ్రద్ధలతో నిర్వహించనున్నారు. అనంతరం మంగళవారం శ్రీశ్రీశ్రీ రేణుకా ఎల్లమ్మ తల్లి కల్యాణ మహోత్సవం ఘనంగా జరగనుంది. ఈ పుణ్య సందర్భంగా భక్తులకు తీర్థప్రసాదాలు పంపిణీతో పాటు అన్నదాన కార్యక్రమం నిర్వహించనున్నట్లు తెలిపారు. మూడు రోజుల పాటు జరిగే ఈ జాతరలో ఒగ్గు పూజారులు పాల్గొని సంప్రదాయ ఆచారాలు, నియమ నిబంధనలు పాటిస్తూ తమదైన ప్రత్యేక శైలిలో పూజా కార్యక్రమాలను నిర్వహించనున్నారు. వారి ప్రత్యేక పద్ధతిలో జరిగే పూజలు, వేదమంత్రోచ్ఛారణల మధ్య భక్తులు స్వామివారి దర్శనం పొందేలా ఏర్పాట్లు చేస్తున్నట్లు నిర్వాహకులు తెలిపారు. జాతర సందర్భంగా ఆలయ ప్రాంగణం విద్యుత్ దీపాలతో అలంకరించబడుతూ భక్తులకు ఆధ్యాత్మిక వాతావరణాన్ని కలిగించేలా ప్రత్యేక ఏర్పాట్లు చేస్తున్నారు. ఈ వేడుకలకు యాదవ సంఘం నాయకులు, వివిధ కుల సంఘాల ప్రతినిధులు, పట్టణ ప్రజలు మరియు భక్తులు పెద్ద ఎత్తున హాజరై విశేష పూజా కార్యక్రమాల్లో పాల్గొని దైవ అనుగ్రహం పొందాలని తుమ్మెట శ్రీనివాస్ యాదవ్ కోరారు. ఈ సందర్భంగా తూప్రాన్ పట్టణం మొత్తం మల్లన్న జాతర ఉత్సాహంతో కళకళలాడుతుందని, భక్తుల రాకతో ఆలయ ప్రాంగణం భక్తి భావంతో మార్మోగనుందని నిర్వాహకులు తెలిపారు.