ప్రతిఏటా “తెలంగాణ కాన్ఫరెన్స్ ఫర్ ఉమెన్ ఇన్ పోలీస్”కార్యక్రమం
తెలంగాణ పోలీస్ అకాడమీని సందర్శించిన డీజీపీ సివి అనంద్
ప్రజాస్వరం, హైదరాబాద్ : జూన్ 04 :
తెలంగాణ రాష్ట్ర డైరెక్టర్ జనరల్ ఆఫ్ పోలీస్ సి.వి. ఆనంద్, హైదరాబాద్లోని రాజా బహదూర్ వెంకటరామరెడ్డి తెలంగాణ పోలీస్ అకాడమీ (RBVRR TGPA)ను సందర్శించారు.అకాడమీ డైరెక్టర్ అభిలాషా బిష్ట్ డీజీపీ కి స్వాగతం పలికారు. గౌరవ వందనం (Guard of Honour)తర్వాత డీజీపీ అకాడమీలోని యూనిట్ ఆసుపత్రి, పరిపాలనా విభాగం, ఆడిటోరియం, తరగతి గదులు, మెస్లు, క్రీడా భవన్, ఫైరింగ్ రేంజ్, పరేడ్ గ్రౌండ్ తదితర ముఖ్య భవనాలు, శిక్షణా సదుపాయాలను పరిశీలించారు.ఆ తర్వాత సమగ్ర సమీక్షా సమావేశం నిర్వహించారు. ఈ సందర్భంగా తెలంగాణ పోలీస్ అకాడమీ డైరెక్టర్ అకాడమీలో నిర్వహిస్తున్న ఇండక్షన్ మరియు ఇన్ సర్వీస్ శిక్షణా కార్యక్రమాలు, సిలబస్, సంస్థాగత బాధ్యతలు, మౌలిక వసతులు, భవన సదుపాయాలు, నిర్వహించిన వర్క్షాప్లు మరియు సెమినార్లు, సంక్షేమ కార్యక్రమాలు, అలాగే అకాడమీ ఎదుర్కొంటున్న ప్రధాన సమస్యల పై సమగ్ర వివరాలను ప్రజెంటేషన్ ద్వారా వివరించారు.అధికారులు మరియు సిబ్బందిని ఉద్దేశించి ప్రసంగించిన సి.వి. ఆనంద్, అకాడమీలో శిక్షణ అందిస్తున్న అధికారులను అభినందిస్తూ, రాజా బహదూర్ వెంకటరామారెడ్డి తెలంగాణ పోలీస్ అకాడమీ దేశంలోని అత్యుత్తమ పోలీసు శిక్షణా సంస్థలలో ఒకటిగా నిలిచిందని పేర్కొన్నారు. పోలీసు శిక్షణలో అత్యుత్తమ ఫలితాలు సాధించాలంటే అధికారులు, సిబ్బంది మధ్య టీమ్ వర్క్ , సమన్వయం మరియు సంస్థాగత స్ఫూర్తి ఎంతో అవసరమని ఆయన చెప్పారు.దేశంలోని ప్రముఖ శిక్షణా సంస్థలలో ఒకటైన NISAలో తన సేవల్ని గుర్తుచేసుకుంటూ, ప్రొఫెషనల్ పోలీసింగ్లో శిక్షణ యొక్క కీలక ప్రాధాన్యాన్ని డీజీపీ వివరించారు. రాష్ట్రవ్యాప్తంగా ఉన్న పోలీస్ ట్రైనింగ్ సెంటర్లు (PTCs), జిల్లా శిక్షణా కేంద్రాలు (DTCs) మరియు ఇతర శిక్షణా సంస్థలను మౌలిక వసతులు మెరుగు పరచడం ద్వారా మరింత బలోపేతం చేయాల్సిన అవసరాన్ని ఆయన ప్రస్తావించారు.శిక్షణా కార్యక్రమాల సమర్థవంతమైన నిర్వహణకు అవసరమైన అనుమతులు, ఇతర సంస్థాగత అవసరాల విషయంలో చీఫ్ ఆఫీస్ నుంచి పూర్తి సహకారం అందిస్తామని డీజీపీ హామీ ఇచ్చారు. అన్ని ర్యాంక్స్ కు చెందిన పోలీసు సిబ్బందికి తప్పనిసరి శిక్షణా కోర్సులను క్రమబద్ధంగా నిర్వహించి, నిర్ణీత సమయంలో పూర్తి చేసేలా చర్యలు తీసుకోవాల్సిన అవసరాన్ని ఆయన ప్రత్యేకంగా నొక్కి చెబుతూ, ఇందుకు చీఫ్ ఆఫీస్ నుంచి అవసరమైన అన్ని సహాయ సహకారాలు అందజేయబడతాయని పేర్కొన్నారు.అలాగే, మాదకద్రవ్యాల నియంత్రణ (NDPS) అమలు, సైబర్ నేరాల దర్యాప్తు, మోటారు వాహనాల చట్టం అమలు, రోడ్డు భద్రత మరియు ఈ అంశాలపై ప్రజల్లో అవగాహన కల్పించడం వంటి వాటి పై ప్రత్యేక దృష్టి సారించాలని అకాడమీ అధికారులకు డీజీపీ సూచించారు. తద్వారా కార్యాచరణ పరమైన పోలీసింగ్ సామర్థ్యాలను మరింత బలోపేతం చేయవచ్చని తెలిపారు.తెలంగాణ పోలీస్ అధికారుల రిట్రీట్ (Telangana Police Officers’ Retreat) కార్యక్రమాన్ని ప్రతి సంవత్సరం నవంబర్ చివరి వారంలో లేదా డిసెంబర్ మొదటి వారంలో నిర్వహిస్తామని డీజీపీ ప్రకటించారు. అలాగే, మహిళా సిబ్బందికి సంబంధించి సంస్కరణలు, సమగ్ర భాగస్వామ్యం (Inclusivity), సంస్థాగత మద్దతు వ్యవస్థలను మరింత బలోపేతం చేయడానికి “తెలంగాణ కాన్ఫరెన్స్ ఫర్ ఉమెన్ ఇన్ పోలీస్” కార్యక్రమాన్ని ప్రతి సంవత్సరం నిర్వహించాలని ఆయన సూచించారు.ఈ కార్యక్రమంలో అకాడమీకి చెందిన సీనియర్ అధికారులు మరియు సిబ్బంది పాల్గొన్నారు.
