మెదక్ ,సెప్టెంబర్ 21 (ప్రజాస్వరం) :
ఇండియన్ రెడ్క్రాస్ సొసైటీ మెదక్ జిల్లా శాఖ నిర్వహణ కమిటీ ఎన్నికలను అక్టోబర్ 4 న నిర్వహించనున్నట్లు ఎన్నికల అధికారి, మెదక్ ఆర్డీవో రమాదేవి తెలిపారు. ఎన్నికలకు సంబంధించి తుది సభ్యుల జాబితాను ప్రచురించినట్లు పేర్కొన్నారు. ఈ నెల 24 న ఉదయం 10 నుంచి మధ్యాహ్నం 1 గంట వరకు మెదక్ ఆర్డీవో కార్యాలయంలో నామినేషన్లు స్వీకరిస్తారు. 25న నామినేషన్ల పరిశీలన, చెల్లుబాటు అయ్యే అభ్యర్థుల జాబితా ప్రకటన, 26న నామినేషన్ల ఉపసంహరణ, తుది జాబితా, గుర్తుల కేటాయింపు చేపడతారు. అక్టోబర్ 4న అవసరమైన పక్షంలో ఉదయం 8 నుంచి మధ్యాహ్నం 3 గంటల వరకు పోలింగ్ నిర్వహించి, సాయంత్రం 4 గంటల నుంచి ఓట్ల లెక్కింపు చేపడతారు. అనంతరం ఫలితాలను ప్రకటించి ఆఫీస్ బేరర్ల ఎన్నిక నిర్వహిస్తారు. నామినేషన్ ఫీజుగా రూ.10 వేల తిరిగి చెల్లించని రుసుము చెల్లించాల్సి ఉంటుందని తెలిపారు. ఎన్నికల వివరాల కోసం 9346999257 నంబర్ ను సంప్రదించాలని సూచించారు.
