ప్రజాస్వరం,మేడ్చల్ :

మేడ్చల్ పట్టణంలోని శ్రీ శ్రీ శ్రీ గడి మైసమ్మ తల్లి దేవాలయంలో నవరాత్రి ఉత్సవాలు భక్తిశ్రద్ధలతో కొనసాగుతున్నాయి. ఉత్సవాల్లో భాగంగా మొదటి రోజు అమ్మవారు శ్రీ బాల త్రిపుర సుందరీ దేవి అలంకరణలో భక్తులకు దర్శనమిచ్చారు. ప్రత్యేక అలంకరణలో కొలువుదీరిన అమ్మవారిని దర్శించుకుని భక్తులు పూజలు నిర్వహించారు. అమ్మవారి కృపాకటాక్షాలు తమపై ఉండాలని భక్తులు ప్రార్థించారు. నవరాత్రి ఉత్సవాల సందర్భంగా ఆలయంలో ఆధ్యాత్మిక వాతావరణం నెలకొంది. అమ్మవారి దర్శనంతో భక్తులు భక్తిపారవశ్యంలో మునిగిపోయారు.

 జాతీయ రహదారి దిగ్బంధం: వంటేరు ప్రతాప్ రెడ్డి వార్నింగ్...

తూప్రాన్, అక్టోబర్ 05 (ప్రజాస్వరం) :

ప్రతినిధి

 రైతులకు 12 గంటల వ్యవసాయ విద్యుత్ సరఫరా చేయాలని గజ్వేల్ నియోజకవర్గ బీఆర్ఎస్ పార్టీ ఇంచార్జ్ వంటేరు ప్రతాప్ రెడ్డి డిమాండ్ చేశారు.శనివారం తూప్రాన్ మండలం నాగులపల్లి శివారులో ఓ రైతు కు చెందిన ఎండిపోయిన వరి పొలాలను ఆయన పరిశీలించారు.ఈ సందర్భంగా వంటేరు ప్రతాప్ రెడ్డి మాట్లాడుతూ...కాంగ్రెస్ ప్రభుత్వ నిర్లక్ష్యం వల్లనే వరి పంటలు ఎండిపోతున్నాయని మండిపడ్డారు. గత బీఆర్ఎస్ ప్రభుత్వ హయాంలో రైతులకు 24 గంటల ఉచిత కరెంటు ఇచ్చామని, కానీ ఈ ప్రభుత్వం కనీసం 9 గంటలు కూడా ఇవ్వడం లేదనిప్రతాప్ రెడ్డి విమర్శించారు.రెండు, మూడు రోజుల్లోగా విద్యుత్ సరఫరాను మెరుగుపరచాలని అధికారులను కోరారు. లేదంటే రైతులతో కలిసి జాతీయ రహదారి దిగ్బంధం చేస్తామని అయన హెచ్చరించారు. కొండ పొచ్చమ్మ ప్రాజెక్టు నుండి వ్యవసాయం కోసం నీరు వదిలితే చేతికి వచ్చిన పంటలు పండేవి అని బోరుబావులలో నీరు ఉన్నా కరెంట్ లేక పొలాలు ఎండిపోతున్నాయని ప్రతాప్ రెడ్డి ఆవేదన వ్యక్తం చేశారు. ఈ కార్యక్రమంలో బీఆర్ఎస్ మండల అధ్యక్షులు, రైతులు, కార్యకర్తలు తదితరులు పాల్గొన్నారు.

జవహర్ నగర్, నవంబర్ 10,(ప్రజాస్వరం) :

బాలాజీ నగర్ ఆర్యవైశ్య సంఘం సామాజిక సేవ కార్యక్రమాలు అభినందనీయమని మాజీ మేయర్ శాంతి కోటేష్ గౌడ్ అన్నారు. శనివారం అమావాస్య సందర్భంగా బాలాజీ నగర్ లోని శ్రీ వాసవి కన్యకా పరమేశ్వరి అమ్మవారి ఆలయంలో అన్నదాన కార్యక్రమంలో పాల్గొన్నారు. ఈ సందర్భంగా ఆయన మాట్లాడుతూ సంఘం సభ్యులు నిర్ణయించే ఆధ్యాత్మిక సేవా కార్యక్రమాలకు సహాయ సహకారాలు అందిస్తానన్నారు. ఆలయ అభివృద్ధికి సహకరిస్తాను: మాజీ డిప్యూటీ మేయర్ రెడ్డి శెట్టి శ్రీనివాస్, ఆర్యవైశ్య సంఘం సభ్యులు ప్రతి నెల చేపట్టే అన్నదాన కార్యక్రమం తో పాటు ఆలయ అభివృద్ధికి తన వంతు సహాయ సహకారాలు అందజేస్తానని అన్నదాన కార్యక్రమంలో పాల్గొన్న మాజీ డిప్యూటీ మేయర్ రెడ్డి శ్రీనివాస్ అన్నారు. ఈ కార్యక్రమంలో ఆర్యవైశ్య సంఘం అధ్యక్షుడు చిరంజీవి రవీందర్ గుప్తా, మాజీ కాంగ్రెస్ పార్టీ అధ్యక్షుడు బల్లి శ్రీనివాస్ గుప్తా, మాజీ కార్పొరేటర్ శారద మనోహర్ రెడ్డి, కాంగ్రెస్ నాయకులు గజ్వేల్ శంకర్, రాజు యాదవ్, డిఎస్ఎస్ వెంకటేష్, ఆర్యవైశ్య సంఘం నాయకులు తదితరులు పాల్గొన్నారు.

జవహర్ నగర్, అక్టోబర్ 10 (ప్రజాస్వరం):

భారత రాజ్యాంగ హక్కుల పరిరక్షణ సమితి రాష్ట్ర మహిళా విభాగం అధ్యక్షురాలిగా గున్న సంధ్య నియమితులయ్యారు. శనివారం రాష్ట్ర అధ్యక్షుడు మహంకాళి భిక్షు ఆమెకు నియామక పత్రాన్ని అందజేశారు.ఈ సందర్భంగా గున్న సంధ్య మాట్లాడుతూ.. డాక్టర్ బి.ఆర్. అంబేద్కర్ "బోధించు, సమీకరించు, పోరాడు" అనే ఆయన సిద్ధాంతాన్ని ప్రజల్లోకి తీసుకెళ్తానన్నారు.కుల రహిత సమాజం కోసం, సామాజిక న్యాయం కోసం డాక్టర్ బాబాసాహెబ్ అంబేద్కర్ కృషి చేశారన్నారు. మహంకాళి భిక్షు చేస్తున్న జ్ఞానమాల కార్యక్రమాల స్ఫూర్తితో తాను కూడా అంబేద్కర్ ఐడియాలజీ కోసం పనిచేసేందుకు ముందుకు వచ్చినట్లు తెలిపారు.ఈ కార్యక్రమంలో మంద ఆనంద్, అబ్బగోని నాగరాజు,మేడ స్వామి,గడిపే సునీల్,గడ్డం గిరి,జడల కిట్టు,నవీన్, సాలమ్మ తదితరులు పాల్గొన్నారు.

మాక్త మాసన్ పల్లి రైతుకు గజ్వెల్ ఎమ్మార్వో స్వామి సూచన...!

తన పరిస్థితి చూసి నవ్వు వస్తుందా అని రైతు ప్రశ్నించగా, “అవును వస్తది.. బరాబర్ వస్తది”

గజ్వెల్, అక్టోబర్ 10 (ప్రజాస్వరం ):

సమస్య పరిష్కారం కోసం అధికారుల చుట్టూ తిరిగిన ఓ రైతుకు అవమానం ఎదురైందంటూ ఆరోపణలు వెల్లువెత్తుతున్నాయి. తమ వ్యవసాయ భూమి ట్రిపుల్ ఆర్ ప్రాజెక్టులో పోతున్న నేపథ్యంలో భూ రికార్డుల సమస్యతో ఇబ్బందులు పడుతున్న రైతుతో గజ్వేల్ ఎమ్మార్వో మాట్లాడిన తీరు ఇప్పుడు చర్చనీయాంశంగా మారింది. “ఇంకా పురుగుల మందు తాగలేదా.. బ్రతికే ఉన్నావా?” అంటూ ఎమ్మార్వో అవహేళనగా మాట్లాడారని రైతు ఆరోపిస్తున్నారు. దీనికి సంబంధించిన వీడియో సోషల్ మీడియాలో వైరల్‌గా మారడంతో అధికారుల తీరుపై విమర్శలు వ్యక్తమవుతున్నాయి. సిద్దిపేట జిల్లా గజ్వేల్ మండలం మక్తమాసన్ పల్లి గ్రామానికి చెందిన రైతు శాతం రాజు అలియాస్ ఏసు భూ సమస్య ఇప్పుడు హాట్ టాపిక్‌గా మారింది. రైతు శాతం రాజుతో పాటు ఆయన ముగ్గురు అన్నదమ్ములకు సర్వే నంబర్ 65లో ఉన్న భూమిలో ట్రిపుల్ ఆర్ ప్రాజెక్టు కోసం 1 ఎకరం 17 గుంటలు పోతున్నట్లు తెలుస్తోంది. అయితే ఈ భూమికి సంబంధించి 2007 వరకు శాంతం అనసూయ పేరు పై రికార్డులు ఉన్నాయని, ఇప్పటికీ భూమి తము కబ్జాలోనే ఉన్నామని రైతు కుటుంబం తెలిపింది.కానీ 2008లో భూమి శాతం పోచమ్మ పేరుపై ఆన్‌లైన్‌లో నమోదైందని, ట్రిపుల్ ఆర్ భూసేకరణ సమయంలో ఆన్‌లైన్ రికార్డులు పరిశీలించగా ఈ విషయం బయటపడిందని రైతు కుటుంబం పేర్కొంటోంది. దీంతో సమస్య పరిష్కారం కోసం పలుమార్లు గజ్వేల్ ఎమ్మార్వో కార్యాలయం చుట్టూ తిరిగినట్లు తెలిపింది..ఈ క్రమంలో రెండు రోజుల క్రితం ఎమ్మార్వోతో రైతుకు జరిగిన సంభాషణకు సంబంధించిన వీడియో బయటకు రావడంతో వివాదం మొదలైంది. భూ సమస్యతో ఇబ్బందులు పడుతున్న తనను ఉద్దేశించి “ఇంకా పురుగుల మందు తాగలేదా.. బ్రతికే ఉన్నావా?” అంటూ ఎమ్మార్వో మాట్లాడారని రైతు ఆరోపిస్తున్నారు.తన పరిస్థితి చూసి నవ్వు వస్తుందా అని రైతు ప్రశ్నించగా, “అవును వస్తది.. బరాబర్ వస్తది” అంటూ ఎమ్మార్వో సమాధానం ఇచ్చినట్లు వీడియోలో వినిపిస్తోంది.ఈ సంభాషణ సోషల్ మీడియాలో వైరల్‌గా మారడంతో రైతుల పట్ల అధికారుల వ్యవహారశైలి పై విమర్శలు వ్యక్తమవుతున్నాయి. వ్యవసాయ భూమి విషయంలో సమస్య ఎదుర్కొంటూ, జీవనోపాధిపై ఆందోళన చెందుతున్న రైతు పట్ల ఇలాంటి వ్యవహారశైలి ఎంతవరకు సమంజసమని పలువురు ప్రశ్నిస్తున్నారు.

మాజీ సర్పంచ్ బాలమ్మ సేవలను ఆదర్శంగా తీసుకోవాలి...

ప్రజాప్రతినిధిగా ఉన్నప్పుడు చేసిన సేవలు ప్రజల హృదయాల్లో చిరస్థాయిగా ఉంటాయి...

ములుగు, అక్టోబర్ 10 (ప్రజాస్వరం):

ప్రజా ప్రతినిధిగా ఉన్నప్పుడు చేసిన సేవలు ప్రజల హృదయాల్లో చిరస్తాయిగా నిలిచిపోయేలా పదిలంగా ఉంచుతాయని గజ్వేల్ మాజీ ఎమ్మెల్యే తూంకుంట నర్సారెడ్డి,ఉమ్మడి  జిల్లా డిసిసిబి డైరెక్టర్ బట్టు అంజిరెడ్డి, పంచాయితీ రాజ్ సంఘటన్ సిద్దిపేట జిల్లా అధ్యక్షుడు కడపల్ల నరసింహా రెడ్డి,జిల్లా సర్పంచ్ల ఫోరం అధ్యక్షుడు కొన్యాల బాల్ రెడ్డి, బీఆర్ఎస్ నాయకులు జుబేరు పాషా,ఎస్సై రఘుపతి సూచించారు.సిద్దిపేట జిల్లా మండల కేంద్రమైన ములుగులో దివంగత మాజీ సర్పంచ్ చింతకింది బాలమ్మ 17వ వర్ధంతి వేడుకలను కుటుంబ సభ్యులు ఘనంగా నిర్వహించారు. ఈ కార్యక్రమానికి ముఖ్య అతిథిగా నర్సారెడ్డి,అంజిరెడ్డి,జెడ్పీ కో ఆప్షన్ మాజీ సభ్యుడు సలీం,సర్పంచ్ తీగుళ్ల కనకయ్య,మార్కెట్ కమిటీ అధ్యక్షురాలు బాగానోళ్ల విజయ మోహన్,ఉపాధ్యక్షుడు ప్రభాకర్ గుప్త,ఎస్సై, బీఆర్ఎస మండల పార్టీ అధ్యక్షుడు జహంగీర్,కాంగ్రెస్ మండల పార్టీ అధ్యక్షుడు కడపల్ల కృష్ణా రెడ్డి,మాజీ జెడ్పీటీసీ నర్సంపల్లి జయమ్మ అర్జున్ గౌడ్,మాజీ ఎంపీపీ వెంకట్రామిరెడ్డి,మాజీ ఎంపీటీసీ లింగ హరిబాబు హాజరై బాలమ్మ విగ్రహానికి పూలమాలలు వేసి ఘనంగా నివలర్పించారు. ఈ సందర్భంగా వారు మాట్లాడుతూ ములుగు గ్రామ సర్పంచ్ గా బాలమ్మ పారిశుధ్యం,త్రాగు నీటి సమస్యలు లేకుండా చూడటం,విద్యుత్ దీపాల ఏర్పాటు,సీసీ రోడ్లు,మురికి కాలువల నిర్మాణం వంటి సేవలు చిరస్మరణీయం అన్నారు. నేటితరం ప్రజా ప్రతినిధులు బాలమ్మ సేవలను ఆదర్శంగా తీసుకోవాలని సూచించారు. ఈ కార్యక్రమంలో మార్కెట్ కమిటీ డైరెక్టర్ లు కుతాడి శ్రీనివాస్,వాజిద్,మాజీ సర్పంచ్ మక్తాల వెంకటేష్ గౌడ్,జలాల్ పురం రామచంద్రం,వార్డు సభ్యులు నగేష్,తోడేటి లావణ్య రవి,మంద వెంకటేష్,తూర్పింటి లక్ష్మణ్,నాయకులు రంగ సత్యనారాయణ గౌడ్,తీగుళ్ల కుమార్,శివరాములు,ప్రశాంత్ రెడ్డి,నరేందర్ రెడ్డి,రవీందర్ రెడ్డి,శివారెడ్డి,తోడేటి చంద్రయ్య, ఆంజనేయులు తో పాటు తదితరులు పాల్గొన్నారు.

ప్రజాస్వరం,మేడ్చల్ :

మేడ్చల్ పట్టణంలోని గాయత్రి డిగ్రీ కళాశాల ఆధ్వర్యంలో గాయత్రోత్సవ్ 2కే 26 కార్యక్రమాన్ని పట్టణంలోని ఓం శివ సాయి ఫంక్షన్ హాల్ లో ఘనంగా నిర్వహించారు. కార్యక్రమంలో ముందుగా జ్యోతి ప్రజ్వలన కార్యక్రమం నిర్వహించారు. కళాశాల యాజమాన్య సభ్యులు మాట్లాడుతూ గాయత్రీ కళాశాల లోని విద్యార్థుల భవిష్యత్తు కోసం ఉన్నత ప్రమాణాలతో విద్యను అందజేస్తున్నట్లు తెలిపారు. గ్రామీణ ప్రాంతాల నుండి ఉన్నత విద్యకు వస్తున్న విద్యార్థులకు చేయూతనందిస్తూ బంగారు భవిష్యత్తుకు గాయత్రి కళాశాల బాసటగా నిలుస్తుందని అన్నారు. ఈ సందర్భంగా విద్యార్థిని విద్యార్థుల నృత్య ప్రదర్శనలు ఆహుతులను ఎంతగానో ఆకట్టుకున్నాయి. గత సంవత్సరం వరకు కళాశాలలో ఉత్తమ ర్యాంకులను సాధించిన విద్యార్థిని విద్యార్థులను జ్ఞాపకాలతో సత్కరించారు. విద్యార్థులకు నిర్వహించిన క్రీడా పోటీలలో విజేతలకు బహుమతులను అందజేశారు. ఈ కార్యక్రమంలో కళాశాల యాజమాన్య సభ్యులు శివ, గణేష్, శ్రీనివాస్ శర్మ, శ్రీనివాస్, కమలాకర్ రెడ్డి, దేవరాజ్, సత్యనారాయణ నరసింహారెడ్డి, అధ్యాపకులు విద్యార్థులు తదితరులు పాల్గొన్నారు.

ప్రజాస్వరం,మేడ్చల్‌:

మహిళా ఇంజనీరింగ్‌ విద్యార్థులు ఇంజనీరింగ్‌ అనంతరం ఉద్యోగాలకు పరిమితం కాకుండా ఎంటర్‌ప్రైన్యూర్‌గా ఎదగాలని ఎంఎస్‌ఎమ్‌ఈ జాయింట్‌ డైరెక్టర్‌ మధుకర్‌బాబు అన్నారు. గుండ్లపోచంపల్లి డివిజన్‌ పరిధి మైసమ్మగూడలోని మల్లారెడ్డి మహిళా ఇంజనీరింగ్‌ కళాశాలలో 15 రోజుల పాటు సాగిన స్కిల్‌ డెవలప్‌మెంట్‌ పొగ్రామ్‌ ముగింపు కార్యక్రమంలో పాల్గొని విద్యార్థులకు సర్టిఫికెట్లు ప్రధానం చేశారు. కార్యక్రమంలో పాల్గొన్న విద్యార్థిణులు .35 వినూత్న ప్రాజెక్టు ఐడియాలను ప్రదర్శించగా వాటిలో 10 ఉత్తమ ప్రాజెక్టులను ఎంపిక చేశారు. విద్యార్థుల్లో ఆవిష్కరణాత్మక ఆలోచనలు, స్టార్టప్‌ దృక్పథం, వ్యవస్థాపక నైపుణ్యాలు, ఎమ్‌ఎస్‌ఎంఈ రంగంపై అవగాహన పెంపొందించడమే ప్రధాన లక్ష్యంగా కార్యక్రమం చేపట్టినట్లు ప్రిన్సిపాల్‌ మాధవిలత తెలిపారు. కార్యక్రమంలో టీపీఓ పవన్‌కుమార్, అధ్యాపకులు,విద్యార్థులు పాల్గొన్నారు.

ప్రజాస్వరం,మేడ్చల్ :

మేడ్చల్ చెక్‌పోస్ట్‌ వద్ద జాతీయ రహదారి పక్కన ఉన్న రెండు ఫర్నీచర్‌ షాపుల్లో భారీ అగ్నిప్రమాదం చోటుచేసుకుంది. మంటలు పక్కనే ఉన్న మరికొన్ని షాపులకు వ్యాపించడంతో భారీగా పొగ కమ్ముకుంది. దీంతో స్థానికులు, వ్యాపారులు భయాందోళనకు గురయ్యారు. సమాచారం అందుకున్న ఫైర్‌ సిబ్బంది ఘటనా స్థలానికి చేరుకుని మంటలను అదుపులోకి తెచ్చారు.ప్రమాదానికి గల కారణాలు, నష్టం వివరాలు తెలియాల్సి ఉంది.

మనోహరాబాద్, (ప్రజాస్వరం) :

మనోహరాబాద్ మండలం జీడిపల్లి గ్రామంలో 'సేవా సంకల్ప అభియాన్' కార్యక్రమంలో భాగంగా సమాజానికి విశేష సేవలందిస్తున్న అంగన్వాడీ టీచర్లు, ఆశా వర్కర్లు మరియు అంగన్వాడీ సిబ్బందిని ఘనంగా సన్మానించారు. గ్రామీణ ప్రాంతాల్లో ప్రజల ఆరోగ్య రక్షణలో, పిల్లల పౌష్టికాహార పంపిణీలో వారు అందిస్తున్న సేవలను గుర్తించి ఈ ఆత్మీయ సత్కార కార్యక్రమాన్ని నిర్వహించారు.ఈ కార్యక్రమాన్ని సేవా సంకల్ప అభియాన్ కన్వీనర్ కొల్తూరి నరేష్ గౌడ్, కో-కన్వీనర్ పరుం నరేష్ ల ఆధ్వర్యంలో ఎంతో ఘనంగా నిర్వహించారు. ఈ కార్యక్రమానికి ముఖ్య అతిథిగా మండల పార్టీ అధ్యక్షులు వెంకటేష్ గౌడ్ హాజరయ్యారు.ఈ సందర్భంగా ముఖ్య అతిథి వెంకటేష్ గౌడ్ మాట్లాడుతూ... క్షేత్రస్థాయిలో రాత్రింబవళ్ళు కష్టపడి పనిచేస్తూ, ప్రజలకు సంక్షేమ పథకాలను, ఆరోగ్య సేవలను చేరువ చేస్తున్న అంగన్వాడీ మరియు ఆశా వర్కర్ల సేవలు ఎంతో ప్రశంసనీయమని కొనియాడారు. వారి సేవలను గుర్తించి సన్మానించడం అభినందనీయమని కన్వీనర్లను అభినందించారు.కార్యక్రమ కన్వీనర్ కొల్తూరి నరేష్ గౌడ్ మరియు కో-కన్వీనర్ పరుం నరేష్ మాట్లాడుతూ... సమాజ సేవలో ముందుండే ప్రతి ఒక్కరినీ గుర్తించి ప్రోత్సహించడమే 'సేవా సంకల్ప అభియాన్' ముఖ్య ఉద్దేశమని తెలిపారు.ఈ కార్యక్రమంలో స్థానిక నాయకులు  ఏఎన్ఎంఎస్ కార్యకర్తలు,  నాగు ముదిరాజ్, రచ్చ శ్రీకాంత్ పాల్గొన్నారు.

తూప్రాన్, అక్టోబర్ 02.(ప్రజాస్వరం):

పూర్ణరాజు గౌడ్ ప్రతినిధి 

గాంధీ జయంతి సందర్భంగా మెదక్ జిల్లా తూప్రాన్ పట్టణంలోని మహాత్మా గాంధీ విగ్రహానికి పూలమాలలు వేసి ఘనంగా నివాళులర్పించారు.ఈ కార్యక్రమంలో జిల్లా కాంగ్రెస్ పార్టీ అధ్యక్షులు ఆంజనేయులు గౌడ్ మాజీ సర్పంచ్ ల ఫోరం రాష్ట్ర అధ్యక్షులు మైపాల్ రెడ్డి పాల్గొని గాంధీ విగ్రహానికి పూలమాల వేసి నివాళులు అర్పించారు.ఈ సందర్భంగా వారు మాట్లాడుతూ... మహాత్మా గాంధీ చూపిన సత్యం, అహింస మార్గం నేటి సమాజానికి ఎంతో అవసరమని, గాంధీ ఆశయాలను ప్రతి ఒక్కరూ పాటించాలని నాయకులు పిలుపునిచ్చారు.ఈ కార్యక్రమంలో కాంగ్రెస్ పార్టీ నాయకులు,భాస్కర్ రెడ్డి, నర్సింగరావు గడప దేవేందర్, వెంకటేష్ గుప్త, గడ్డం వెంకటేష్ యాదవ్, విశ్వరాజ్ శేషుభూషణ్ రెడ్డి, అనిల్ గౌతమ్ గౌడ్, అబోథ్ వెంకటేష్ కార్యకర్తలు, తదితరులు పాల్గొన్నారు.

మెదక్, అక్టోబర్ 02 (ప్రజాస్వరం) :

మెదక్ జిల్లా కేంద్రంలోని ఎఫ్‌సీఐ గోదాముల సమీపంలో శుక్రవారం జరిగిన రోడ్డు ప్రమాదంలో వ్యవసాయ శాఖ జూనియర్ అసిస్టెంట్‌ సద్దాం హుస్సేన్‌ మృతి చెందారు. రామాయంపేట నుంచి మెదక్‌కు వస్తున్న ఆర్టీసీ బస్సు (టీఎస్‌ 36 టి 0251) బుల్లెట్‌ పై వెళ్తున్న సద్దాం హుస్సేన్‌ వాహనాన్ని ఢీ కొట్టడంతో ప్రమాదం జరిగింది. ఈ ప్రమాదంలో తీవ్రంగా గాయపడిన సద్దాం హుస్సేన్‌ మృతి చెందారు. సమాచారం అందుకున్న మెదక్ పట్టణ పోలీసులు ఘటనా స్థలానికి చేరుకుని కేసు నమోదు చేసి దర్యాప్తు చేపట్టారు. మృతదేహాన్ని పోస్టుమార్టం నిమిత్తం మెదక్ ఏరియా ఆసుపత్రికి తరలించారు. సద్దాం హుస్సేన్‌ మృతి తో మెదక్ పట్టణంలో విషాదం నెలకొంది.

ప్రజాస్వరం,మేడ్చల్ :

మేడ్చల్ లో గాంధీ జయంతి సందర్భంగా మటన్ మార్కెట్‌లో సిఎంసి వెటర్నరీ అధికారులు ఆకస్మిక తనిఖీలు నిర్వహించారు. కొంపల్లి సర్కిల్ వెటర్నరీ వైద్యుడు నాగార్జున్ ఆధ్వర్యంలో చేపట్టిన ఈ దాడుల్లో నిబంధనలకు విరుద్ధంగా ఉన్న రెండున్నర కిలోల మేక మాంసాన్ని స్వాధీనం చేసుకున్నారు. నిబంధనలు ఉల్లంఘిస్తే కఠిన చర్యలు తప్పవని అధికారులు హెచ్చరించారు.

మేడ్చల్,(ప్రజాస్వరం)  :

ఎల్లంపేట్ మున్సిపాలిటీ పరిధిలోని 2వ వార్డులో కౌన్సిలర్ బుక్య శారద రాజు నాయక్ ఆధ్వర్యంలో గాంధీ జయంతి వేడుకలను ఘనంగా నిర్వహించారు. మహాత్మా గాంధీ చిత్రపటానికి పూలమాల వేసి నివాళులర్పించారు.ఈ కార్యక్రమంలో 3వ వార్డు కౌన్సిలర్ గూడూరు విజయలక్ష్మి, 7వ వార్డు కౌన్సిలర్ బందెల కుమార్, మున్సిపల్ సెక్రటరీ అపర్ణతో పాటు సీనియర్ నాయకులు హరిబాబు రెడ్డి, కుమ్మరి జహంగీర్, నాగరాజుచారి, చుక్క సత్యనారాయణ, మామిళ్ల మహేందర్ యాదవ్, బందెల స్వామి, మున్వర్ అలీ, హర్షత్ అలీ, చుక్క శంకర్, జీడిపల్లి అశోక్ తదితరులు పాల్గొన్నారు.

తూప్రాన్, సెప్టెంబర్ 30( ప్రజాస్వరం) :

ప్రతినిధి 

మెదక్ జిల్లా తూప్రాన్ మున్సిపాలిటీలోని బ్రహ్మణపల్లి వద్ద అమూల్‌ పాల కంపెనీ భూమిపూజ కార్యక్రమానికి కేంద్ర హోంశాఖ మంత్రి అమిత్‌ షా అక్టోబర్‌ 4న హాజరుకానున్న నేపథ్యంలో మెదక్‌ జిల్లా ఎస్పీ డి.వి. శ్రీనివాసరావు బుధవారం కార్యక్రమ ప్రదేశాన్ని పరిశీలించి భద్రతా ఏర్పాట్లను ఎస్పీ సమీక్షించారు.ఈ సందర్భంగా కార్యక్రమ వేదిక, వీవీఐపీ రాకపోకల మార్గాలు, పార్కింగ్‌ ప్రాంతాలు, సభా ప్రాంగణం, పరిసర ప్రాంతాలను క్షుణ్ణంగా పరిశీలించారు. వీవీఐపీ భద్రత, బందోబస్తు, ట్రాఫిక్‌ నియంత్రణ, పార్కింగ్‌, ప్రజలు, వీఐపీల ప్రవేశ, నిష్క్రమణ మార్గాలకు సంబంధించి చేపట్టాల్సిన ముందస్తు చర్యలపై పోలీసు అధికారులతో ఎస్పీ చర్చించారు.కార్యక్రమానికి హాజరయ్యే ప్రజలకు ఎలాంటి ఇబ్బందులు కలగకుండా ట్రాఫిక్‌ నియంత్రణకు ప్రత్యేక చర్యలు చేపట్టాలని, వాహనాల పార్కింగ్‌కు తగిన ఏర్పాట్లు చేయాలని ఎస్పీ సూచించారు. కార్యక్రమ ప్రాంగణం, పరిసర ప్రాంతాల్లో నిరంతరం నిఘా కొనసాగించాలని, అనుమానాస్పద వ్యక్తులు, వస్తువుల విషయంలో అప్రమత్తంగా ఉండాలని సిబ్బందికి సూచించారు.వీవీఐపీ పర్యటన నేపథ్యంలో విధులు నిర్వహించే ప్రతి పోలీసు అధికారి, సిబ్బంది తమకు కేటాయించిన బాధ్యతలను సమర్థవంతంగా నిర్వర్తించాలని ఎస్పీ ఆదేశించారు. భద్రతా ఏర్పాట్లలో ఎలాంటి లోపాలకు తావులేకుండా సంబంధిత శాఖలతో సమన్వయం చేసుకుంటూ ముందస్తు చర్యలు చేపట్టాలని ఎస్పీ శ్రీనివాస్ రావు స్పష్టం చేశారు.ఈ కార్యక్రమంలో తూప్రాన్‌ డీఎస్పీ జె. నరేందర్‌ గౌడ్‌, సీఐలు సందీప్‌ రెడ్డి, రంగకృష్ణ, ఆర్‌ఐ శైలేందర్‌, ఎస్‌ఐలు గంగా రాజు, సుభాష్‌ గౌడ్‌, సిబ్బంది పాల్గొన్నారు.

చందమ్మకోట సుందరీకరణకు తొలి అడుగులు..

చిన్న శంకరంపేట, సెప్టెంబర్ 30 ( ప్రజాస్వరం ) :

చిన్న శంకరంపేట మండలం చందంపేట గ్రామంలోని అతి పురాతనమైన చందమ్మకోట (గడి కోట) సుందరీకరణకు తొలి అడుగులు ప్రారంభమయ్యాయి. పురాతన కట్టడాలను సంరక్షించి వాటి చారిత్రక ప్రాధాన్యతను కాపాడాలన్న జిల్లా కలెక్టర్ ప్రతిమ సింగ్ ఆదేశాల మేరకు ఈ చర్యలు చేపట్టారు.డెక్కన్ టెర్రా, హెరిటేజ్ సంస్థల ప్రతినిధులు చందమ్మకోటను సందర్శించి, కోట పరిసరాలను పరిశీలించారు. సుందరీకరణ, అభివృద్ధి పనులకు సంబంధించి గడి కోట చుట్టూ కొలతలు తీసుకున్నారు. కోట చారిత్రక నేపథ్యాన్ని కాపాడుతూ భవిష్యత్‌లో చేపట్టాల్సిన అభివృద్ధి పనులకు అనుగుణంగా ప్రాథమికంగా స్థల పరిశీలన, కొలతలు చేపట్టినట్లు సంస్థ ప్రతినిధులు మీర్కన్, డాక్టర్ మంజుల, జైఇకల్, నైనాషాహరీ, జనాత్ తెలిపారు.ఈ కార్యక్రమంలో చందంపేట సర్పంచ్ నాయిని ప్రవీణ్ కుమార్, ఉప సర్పంచ్ నర్సింలు తదితరులు పాల్గొన్నారు. ఈ సందర్బంగా సర్పంచ్ ప్రవీణ్ మాట్లాడుతు పురాతన చందమ్మకోటకు సుందరీకరణ చేపట్టడంతో గ్రామానికి చారిత్రక గుర్తింపు మరింత పెరగడంతో పాటు, భవిష్యత్‌లో పర్యాటక ప్రాంతంగా అభివృద్ధి చెందే అవకాశం ఉందని ఆశాభావం వ్యక్తం చేస్తున్నారు.

రామమ్మ కుటుంబాన్ని పరామర్శించిన కంఠారెడ్డి తిరుపతి రెడ్డి....

మెదక్, సెప్టెంబర్ 29 (ప్రజాస్వరం) :

మెదక్ మండలం చిట్యాల మాజీ సర్పంచ్ పట్లోరి వెంకటేశం చిన్నమ్మ పట్లోరి. రామమ్మ ఆదివారం మృతి చెందడంతో విషయం తెలుసుకున్న బిఆర్‌ఎస్ రాష్ట్ర నాయకులు కంఠారెడ్డి తిరుపతి రెడ్డి మంగళవారం చిట్యాల గ్రామానికి వెళ్లారు. మాజీ సర్పంచ్ వెంకటేశం ను, రామమ్మ కుటుంబ సభ్యులను పరామర్శించి, వారితో మాట్లాడి ప్రస్తుత పరిస్థితిని తెలుసుకున్నారు. ఈ సందర్భంగా కుటుంబ సభ్యులకు మనోధైర్యం కల్పించి, రామమ్మ మృతి పట్ల సంతాపం వ్యక్తం చేశారు.వీరి వెంట జానకంపల్లి మాజీ సర్పంచ్ సంగమేశ్వర్, మాజీ మార్కెట్ కమిటీ చైర్మన్ కసిరెడ్డి మాణిక్య రెడ్డి, బిఆర్ఎస్వి నాయకులు గంజి.నవీన్, మాజీ ఎంపీటీసీ మల్లేశం, నాయకులు సిద్దిరాములు, శేఖర్, దుర్గష్, గ్రామ కార్యకర్తలు ఉన్నారు.

గత పాలనలో పేదలకు అన్యాయం జరిగింది...

మెదక్, సెప్టెంబర్ 29 (ప్రజాస్వరం) :

మెదక్ జిల్లా కేంద్రంలోని శ్రీ వెంకటేశ్వర గార్డెన్స్‌లో పేదలకు డబుల్ బెడ్‌రూం ఇళ్ల పట్టాలను ఎమ్మెల్యే డాక్టర్ మైనంపల్లి రోహిత్‌రావు పంపిణీ చేశారు. ఈ సందర్భంగా ఆయన మాట్లాడుతూ అర్హులైన పేదలందరికీ న్యాయంగా ఇళ్లు అందించడమే కాంగ్రెస్ ప్రభుత్వ లక్ష్యమన్నారు. గత పదేళ్ల బీఆర్‌ఎస్ పాలనలో పేదలకు ఇళ్ల విషయంలో అన్యాయం జరిగిందని విమర్శించారు. కాంగ్రెస్ ప్రభుత్వం అధికారంలోకి వచ్చిన తర్వాత ఇందిరమ్మ రాజ్యంలో పేదల సొంతింటి కలను నెరవేర్చేందుకు చర్యలు చేపడుతున్నామని తెలిపారు. సన్నబియ్యం, ఉచిత విద్యుత్, మహిళలకు ఉచిత బస్సు ప్రయాణం వంటి సంక్షేమ పథకాలను అమలు చేస్తున్నామని పేర్కొన్నారు. గత ప్రభుత్వ పాలనలో అవినీతి జరిగిందని ఆరోపించిన ఎమ్మెల్యే ప్రజలకు ఆశలు కల్పిస్తూ పదేళ్లు కాలయాపన చేశారని విమర్శించారు. రాష్ట్రాన్ని అప్పులపాలు చేశారని అన్నారు. దళిత బంధు పథకం ద్వారా గతంలో ఎంత మందికి లబ్ధి చేకూర్చారో చెప్పాలని ప్రశ్నించారు. ప్రజల మధ్య నిరంతరం పర్యటిస్తూ వారి సమస్యలను తెలుసుకుంటున్నామని తెలిపారు. గ్రామాల్లో పర్యటించినప్పుడు పేదలు ఇళ్ల కోసం తమ సమస్యలను చెబుతున్నారని, అర్హులైన ప్రతి కుటుంబానికి న్యాయంగా ఇళ్లు అందేలా చర్యలు తీసుకుంటున్నామని చెప్పారు. ఇళ్ల మంజూరు కోసం ఎవరూ డబ్బులు ఇవ్వవద్దని ఎమ్మెల్యే సూచించారు. అర్హత ఉన్న ప్రతి కుటుంబానికి పారదర్శకంగా ఇళ్లు అందేలా పనిచేస్తామని స్పష్టం చేశారు. గత ప్రభుత్వ తప్పిదాలను తమ ప్రభుత్వంపై నెట్టే ప్రయత్నాలను సహించబోమని ఆయన అన్నారు. ఈ కార్యక్రమంలో ఆర్డీవో రమాదేవి, ఎమ్మార్వో లక్ష్మణ్ బాబు, హౌసింగ్ పీడీ మాణిక్యం, మున్సిపల్ చైర్మన్ రాధిక, వైస్ చైర్మన్ దొంతి నరేష్ గౌడ్, మున్సిపల్ కమిషనర్ నవీన్, కౌన్సిలర్స్ గంట సంపత్, మన్సూర్, దీపక్ కుమార్, జుబెర్, బట్టి ఉదయ్, హరిత, రాణి, చింతల స్వరగిణీ, నాయకులు తదితరులు పాల్గొన్నారు.

మెదక్, సెప్టెంబర్ 30 (ప్రజాస్వరం) :

సీఎం రేవంత్ రెడ్డి చేసిన వ్యాఖ్యలకు నిరసనగా బీజేపీ పట్టణ అధ్యక్షుడు నాయిని ప్రసాద్ ఆధ్వర్యంలో బుధవారం మెదక్ రాందాస్ చౌరస్తాలో ఆందోళన నిర్వహించారు. ఈ సందర్భంగా రేవంత్ రెడ్డి దిష్టిబొమ్మ ను దహనం చేశారు. హిందూ దేవుళ్ల పై సీఎం రేవంత్ రెడ్డి చేసిన వ్యాఖ్యలను ఖండిస్తున్నట్లు బీజేపీ మాజీ జిల్లా అధ్యక్షుడు గడ్డం శ్రీనివాస్ తెలిపారు. ప్రతి ఒక్కరూ తమకు నచ్చిన దేవుడిని ఆరాధించుకునే హక్కు ఉందని, ఇతరుల మత విశ్వాసాలను గౌరవించాలని అన్నారు. దేశాన్ని ప్రాంతాల వారీగా విభజించే వ్యాఖ్యలు చేయడం ద్వారా ప్రజల మనోభావాలను దెబ్బతీయవద్దని సూచించారు. ఈ కార్యక్రమంలో కౌన్సిలర్ పబ్బ రాజమణి లక్ష్మణ్, మెదక్ జిల్లా వాణిజ్య విభాగం అధ్యక్షుడు బజ్జూరి భిక్షపతి, జనరల్ సెక్రటరీ రంజిత్ రెడ్డి, సాయి గౌడ్, సాయి దీపు, జిల్లా నాయకులు లోకేష్, అల్లం మధు, రాహుల్, ఆమ్దం సాయి, సన్నీ, కిరణ్ తదితరులు పాల్గొన్నారు.

ప్రజాస్వరం,మేడ్చల్ :

మేడ్చల్ పోలీస్ స్టేషన్ పరిధిలోని శ్రీ గౌరీ లిక్కర్ మార్ట్‌లో అర్ధరాత్రి చోరీ చోటుచేసుకుంది. గుర్తుతెలియని వ్యక్తులు పర్మిట్ రూమ్ పక్కన ఉన్న రేకును కత్తిరించి లోపలికి ప్రవేశించినట్లు తెలుస్తోంది. ఉదయం నిర్వాహకులు దుకాణానికి వచ్చి చూడగా రేకు కత్తిరించి ఉండటాన్ని గుర్తించి వెంటనే పోలీసులకు సమాచారం అందించారు.సమాచారం అందుకున్న పోలీసులు ఘటనా స్థలానికి చేరుకుని పరిశీలించారు. చోరీకి గురైన నగదు, మద్యం లేదా ఇతర వస్తువుల వివరాలను నిర్వాహకుల నుంచి సేకరిస్తున్నారు. ఘటనపై కేసు నమోదు చేసి దర్యాప్తు చేపట్టిన పోలీసులు, దొంగలను గుర్తించేందుకు పరిసర ప్రాంతాల్లోని సీసీ కెమెరాల ఫుటేజీలను పరిశీలిస్తున్నారు.

మృతుల కుటుంబాలను పరామర్శించి ధైర్యం చెప్పిన బీఆర్‌ఎస్‌ రాష్ట్ర నాయకులు..

చిన్న శంకరంపేట,సెప్టెంబర్ 29 ( ప్రజాస్వరం) :

ఆపదలో ఉన్న కుటుంబాలకు అండగా నిలుస్తూ, బాధితుల కష్టాల్లో భాగస్వామిగా ఉంటున్న బీఆర్‌ఎస్‌ రాష్ట్ర నాయకులు కంఠారెడ్డి తిరుపతిరెడ్డి మంగళవారం చిన్న శంకరంపేట మండలంలో పర్యటించారు. ఇటీవల మృతి చెందిన వారి కుటుంబాలను పరామర్శించి, కుటుంబ సభ్యులకు ధైర్యం చెప్పారు. బాధిత కుటుంబాలకు తాను అండగా ఉంటానని భరోసా కల్పించారు. చందంపేట గ్రామానికి చెందిన విలేకరి తాటికొండ సుధాకర్‌ తండ్రి కృష్ణ ఇటీవల మృతి చెందారు కంఠారెడ్డి తిరుపతిరెడ్డి వారి కుటుంబాన్ని పరామర్శించి, కృష్ణ మృతికి సంతాపం తెలిపారు. కుటుంబ సభ్యులను ఓదార్చి ధైర్యం చెప్పారు.అనంతరం జంగారాయి గ్రామానికి చెందిన బొమ్మరబోయిన కృష్ణ కుమార్తె కీర్తన ప్రైవేట్‌ బస్సు డ్రైవర్‌ నిర్లక్ష్యంతో మృతి చెందిన విషయం తెలుసుకుని, వారి కుటుంబ సభ్యులను పరామర్శించారు. కీర్తన మృతికి సంతాపం తెలిపి, కుటుంబ సభ్యులకు ధైర్యం చెప్పారు. బాధిత కుటుంబానికి అండగా ఉంటానని భరోసా కల్పించారు. ఆయనతో పాటు గ్రామ అధ్యక్షుడు గడ్డం సురేష్‌, మాజీ మార్కెట్‌ డైరెక్టర్‌ బందెల ప్రభాకర్‌, సొసైటీ డైరెక్టర్‌ చౌటకూరి శ్యామ్‌, యూత్‌ అధ్యక్షుడు దుర్గం మహేష్‌గౌడ్‌, సిద్ధ రాములు, బందెల బన్ని, కరోల అనిల్‌, దేవదాస్‌, ముత్యాలు, భూపాల్‌రెడ్డి, గడ్డం నందు, నరసింహులు, మాజీ ఉపసర్పంచ్‌ లక్ష్మీపతి, ఎస్సీ సెల్‌ మండల ఉపాధ్యక్షుడు బందెల సుధాకర్‌, మాజీ సర్పంచ్‌ కుమార్‌గౌడ్‌, మాజీ వైస్‌ ఎంపీపీ సత్యనారాయణగౌడ్‌, రామాయపల్లి సర్పంచ్‌ రేణుక తిరుపతి, మాజీ సర్పంచ్‌ గుగులోత్‌ సుధాకర్‌, మాజీ ఎంపీటీసీ బాచుపల్లి యాదగిరి, మాజీ సర్పంచ్‌ తోట రమేష్‌, గజట్లపల్లి ఉపసర్పంచ్‌ రాజు తదితరులు పాల్గొన్నారు.

మెదక్, సెప్టెంబర్ 29 (ప్రజాస్వరం) :

పాపన్నపేట మండల కాంగ్రెస్ పార్టీ మైనారిటీ సెల్ అధ్యక్షుడిగా ఎం. ఖలీం మియా ను నియమించారు. ఈ సందర్భంగా మెదక్ ఎమ్మెల్యే క్యాంప్ కార్యాలయంలో కాంగ్రెస్ పార్టీ జిల్లా అధ్యక్షుడు ఆంజనేయులు గౌడ్, మైనారిటీ సెల్ జిల్లా చైర్మన్ సూఫీ జానీ ఆయనకు నియామక పత్రాన్ని అందజేశారు. ఈ సందర్భంగా ఖలీం మియా మాట్లాడుతూ తనపై నమ్మకంతో బాధ్యతలు అప్పగించినందుకు కృతజ్ఞతలు తెలిపారు. పార్టీ బలోపేతానికి శక్తివంచన లేకుండా కృషి చేస్తానన్నారు. మాజీ ఎమ్మెల్యే మైనంపల్లి హనుమంతరావు, ఎమ్మెల్యే మైనంపల్లి రోహిత్‌రావుకు ప్రత్యేక ధన్యవాదాలు తెలిపారు.

కుటుంబ కలహాలతో భర్త హత్య.. భార్య, ఆమె తండ్రికి జీవిత ఖైదు..

నిందితులకు శిక్ష పడేలా కృషి చేసిన అధికారులు, సిబ్బందికి అదనపు ఎస్పీ అభినందనలు..

తూప్రాన్, సెప్టెంబర్ 28 (ప్రజాస్వరం):

ప్రతినిధి 

మెదక్ జిల్లా తూప్రాన్ మండలం ఘనపూర్ లో కుటుంబ కలహాల నేపథ్యంలో వెంకటేష్‌ను చిత్రహింసలకు గురిచేసి హత్య చేసిన కేసులో నిందితులైన భార్య విజయ, ఆమె తండ్రి నర్సింలుకు జీవిత ఖైదుతో పాటు రూ.5 వేల చొప్పున జరిమానా విధిస్తూ జిల్లా ప్రధాన న్యాయమూర్తి నీలిమ తీర్పు వెలువరించినట్లు మెదక్ జిల్లా అదనపు ఎస్పీ విక్రాంత్‌కుమార్ సింగ్ ఐపీఎస్ తెలిపారు.వివరాల్లోకి వెళ్తే.. తూప్రాన్ మండలం ఘనపూర్‌కు చెందిన దొడ్ల వెంకటేష్ (38) తన భార్య విజయ, ఇద్దరు కుమార్తెలతో కలిసి నివాసం ఉంటున్నాడు. కొంతకాలంగా కుటుంబ విషయాలపై భార్యాభర్తల మధ్య గొడవలు జరుగుతున్నాయి. 01.09.2023న రాఖీ పండుగ సందర్భంగా విజయ తండ్రి నర్సింలు, ఇతర బంధువులతో కలిసి వెంకటేష్ ఇంటికి వచ్చారు. అదే రోజు రాత్రి సుమారు 11.30 గంటల సమయంలో వెంకటేష్‌ను కొబ్బరి తాళ్లు, చున్నీతో కట్టేసి దాడి చేశారు. అనంతరం అతడిపై వేడి నీళ్లు పోసి గదిలో ఉంచి తాళం వేశారు.ఈ విషయాన్ని విజయ ఫోన్ ద్వారా వెంకటేష్ తమ్ముడికి తెలియజేయడంతో రామంతాపూర్‌కు చెందిన శ్రీనివాస్ ఘనపూర్‌కు చేరుకుని గది తాళం పగలగొట్టి వెంకటేష్‌ను బయటకు తీసుకొచ్చాడు. అనంతరం తూప్రాన్ ఆస్పత్రికి తరలించగా, వైద్యుల సూచన మేరకు మెరుగైన వైద్యం కోసం హైదరాబాద్‌కు తరలించారు. పరిస్థితి విషమించడంతో చికిత్స పొందుతూ వెంకటేష్ మృతి చెందాడు.వెంకటేష్ సోదరుడు ఇచ్చిన ఫిర్యాదు మేరకు అప్పటి తూప్రాన్ ఎస్‌ఐ శివానందం కేసు నమోదు చేశారు. అప్పటి తూప్రాన్ సీఐ, దర్యాప్తు అధికారి శ్రీధర్ సమగ్ర దర్యాప్తు చేపట్టి కీలక సాక్ష్యాధారాలను సేకరించారు. కేసు విచారణ సమయంలో పబ్లిక్ ప్రాసిక్యూటర్ వెంకటేష్ బలమైన వాదనలు వినిపించారు. ప్రస్తుత దర్యాప్తు అధికారి వెంకట రాజాగౌడ్, ఎస్‌ఐ గంగరాజు సాక్షులను కోర్టులో ప్రవేశపెట్టారు. పోలీసులు సమర్పించిన సాక్ష్యాధారాలను పరిశీలించిన జిల్లా ప్రధాన న్యాయమూర్తి నీలిమ నిందితులు విజయ, నర్సింలుకు జీవిత ఖైదుతో పాటు రూ.5 వేల చొప్పున జరిమానా విధిస్తూ తీర్పు ఇచ్చారు.కేసులో నిందితులకు శిక్ష పడేలా సమర్థవంతంగా దర్యాప్తు చేసి, పకడ్బందీగా సాక్ష్యాధారాలను సేకరించి కోర్టులో ప్రవేశపెట్టిన అధికారులు, సిబ్బందిని అదనపు ఎస్పీ విక్రాంత్‌కుమార్ సింగ్ ఐపీఎస్ అభినందించారు. నేరం చేసిన నిందితులకు చట్ట ప్రకారం శిక్ష పడేలా పోలీసు శాఖ నిరంతరం కృషి చేస్తుందని ఆయన తెలిపారు.ఈ కేసులో కోర్టు లైజనింగ్ అధికారులు ఎస్‌ఐ విట్టల్, కానిస్టేబుల్ రవీందర్‌గౌడ్, సీడీఓ నాగరాజు తూప్రాన్ ఎసై గంగరాజు సహకరించినట్లు అదనపు ఎస్పీ తెలిపారు.

తూప్రాన్ లో జిల్లా సదస్సు... 

తూప్రాన్, సెప్టెంబర్ 28 (ప్రజాస్వరం) :

పూర్ణారాజు గౌడ్ ప్రతినిధి 

ప్రభుత్వ రంగ సంస్థలు దేశ ఆర్థికాభివృద్ధికి, ప్రజలకు నాణ్యమైన సేవలు అందించడానికి ఎంతో కీలకమైనవని సీఐటీయూ రాష్ట్ర ఉపాధ్యక్షులు ఈశ్వర్ రావు అన్నారు. “ప్రభుత్వ రంగ సంస్థలు – వాటి పరిరక్షణ” అంశంపై తూప్రాన్ పట్టణంలో శివ సాయి ఫంక్షన్ హాల్‌లో నిర్వహించిన సదస్సుకు ఆయన ముఖ్య అతిథిగా హాజరై ప్రసంగించారు.ఈ సందర్భంగా ఈశ్వర్ రావు మాట్లాడుతూ.. ప్రభుత్వ రంగ సంస్థలు దేశ ప్రజల ఆస్తులని, వాటిని ప్రైవేటు వ్యక్తులకు అప్పగించడం వల్ల ప్రజా ప్రయోజనాలు దెబ్బతినే అవకాశం ఉందన్నారు. విద్యుత్, బ్యాంకింగ్, రవాణా, ఉక్కు, బొగ్గు తదితర కీలక రంగాల్లో ప్రభుత్వ రంగ సంస్థలు దేశ అభివృద్ధిలో ముఖ్యమైన పాత్ర పోషిస్తున్నాయని తెలిపారు.ప్రభుత్వ రంగ సంస్థలను మరింత బలోపేతం చేయాల్సిన అవసరం ఉందన్నారు. సంస్థల్లో ఖాళీగా ఉన్న పోస్టులను భర్తీ చేసి, యువతకు ఉపాధి అవకాశాలు కల్పించాలని కోరారు. కాంట్రాక్టు, ఔట్‌సోర్సింగ్ విధానంలో పనిచేస్తున్న కార్మికులకు ఉద్యోగ భద్రత కల్పించి, సమాన పనికి సమాన వేతనం అమలు చేయాలని డిమాండ్ చేశారు.కార్మికుల హక్కులను పరిరక్షించడంతో పాటు కనీస వేతనాలు, సామాజిక భద్రత, ఉద్యోగ భద్రత వంటి అంశాలకు ప్రాధాన్యత ఇవ్వాలని అన్నారు. ప్రభుత్వ రంగ సంస్థలను నిర్వీర్యం చేసే విధానాలను ఉపసంహరించుకుని, వాటి అభివృద్ధికి అవసరమైన నిధులు, మౌలిక వసతులు కల్పించాలని కోరారు.ప్రభుత్వ రంగ సంస్థల పరిరక్షణ అనేది ఉద్యోగులు, కార్మికుల సమస్య మాత్రమే కాదని, అది దేశ ప్రజల ప్రయోజనాలకు సంబంధించిన అంశమని ఈశ్వర్ రావు పేర్కొన్నారు. ప్రభుత్వ రంగ సంస్థలను కాపాడుకోవడానికి కార్మికులు, ఉద్యోగులు, ప్రజలు ఐక్యంగా ముందుకు రావాలని ఆయన పిలుపునిచ్చారు.ఈ సదస్సులో సీఐటీయూ జిల్లా కార్యదర్శి ఏ. మల్లేశం తెలంగాణ రాష్ట్ర యునైటెడ్ ఎలక్ట్రిసిటీ ఎంప్లాయిస్ యూనియన్ (సీఐటీయూ) గౌరవ అధ్యక్షులు ఏ. మహేందర్ రెడ్డి,జిల్లా అధ్యక్ష,కార్యదర్శిలు యం. నర్సoలు.రవీంద్ర ప్రసాద్, అడ్వైజర్ స్వామి,ఉపాధ్యక్షులు నాగరాజు,ఫాసి,హనుమంత్. అశోక్,వెంకటేష్,శ్రీను యాదగిరి తదితరులు పాల్గొన్నారు.

స్థానిక వాటర్‌మ్యాన్‌ను నియమించాలి

ప్రజాస్వరం,మేడ్చల్:

వెంకట్ 

మేడ్చల్ డివిజన్ పరిధిలోని గిర్మాపూర్‌లో వాటర్‌మ్యాన్ శ్రీరాములు మృతి చెందడంతో గత నెల రోజులుగా నీటి సరఫరాలో అంతరాయం ఏర్పడి ప్రజలు తీవ్ర ఇబ్బందులు ఎదుర్కొంటున్నారు.ఈ సమస్యపై మేడ్చల్ సర్కిల్ డిప్యూటీ కమిషనర్ సుధాంశ్ ను కలిసి బీజేపీ నాయకులు వినతిపత్రం అందజేసి, గిర్మాపూర్ ప్రాంతానికి చెందిన స్థానిక వ్యక్తినే వాటర్‌మ్యాన్‌గా నియమించాలని కోరారు.ఇతర ప్రాంతాలకు చెందిన వారిని వాటర్‌మ్యాన్‌గా నియమించడం వల్ల గిర్మాపూర్ ప్రాంతంలోని నీటి సరఫరా వ్యవస్థపై పూర్తి స్థాయి అవగాహన లేక ఇబ్బందులు ఎదురవుతున్నాయని అధికారుల దృష్టికి తీసుకెళ్లారు. ప్రజల తాగునీటి సమస్యను దృష్టిలో ఉంచుకుని స్థానిక వాటర్‌మ్యాన్‌ను నియమించి, నిరంతర నీటి సరఫరా జరిగేలా తక్షణ చర్యలు తీసుకోవాలని కోరారు.ఈ కార్యక్రమంలో మేడ్చల్ మున్సిపాలిటీ మాజీ అధ్యక్షులు కొండం ఆంజనేయులు ముదిరాజ్, బీజేవైఎం జిల్లా నాయకులు రాఘవ రెడ్డి, డివిజన్ కిసాన్ మోర్చా అధ్యక్షులు చీర్ల సత్యనారాయణ, డివిజన్ బిజెపి కార్యదర్శి బండి విష్ణు గౌడ్ తదితరులు ఉన్నారు.

ప్రజాస్వరం,మేడ్చల్:

వెంకట్ 

పార్టీ అధికారంలో లేనప్పుడు డబ్బులు ఖర్చు పెట్టుకొని పార్టీ మనుగడకు కృషి చేసిన నాయకులు,కార్యకర్తలను జిల్లా నాయకత్వం గుర్తించాలని కాంగ్రెస్ పార్టీ మేడ్చల్ మాజీ మండల అధ్యక్షుడు రమణారెడ్డి డిమాండ్ చేశారు.ఏండ్లుగా ఆస్తులు అమ్ముకొని పని చేస్తున్న తమకు కాదని ప్రజల్లో లేని నాయకులకు పదవులు కట్టబెట్టడం పై ఆగ్రహం వ్యక్తం చేశారు.జిల్లా నాయకులు నియామకంలో అర్హుహళ్లకే పదవులు ఇవ్వాలని లేదంటే అంబేద్కర్ విగ్రహం వద్ద ఆందోళన చేస్తామని హెచ్చరించారు.

ప్రజాస్వరం,మేడ్చల్ :

మేడ్చల్‌లోని CSI వెస్లీ చర్చిలో 80వ CSI ఫార్మేషన్ డే, ఉమెన్స్ సండే సర్వీస్‌ను ఘనంగా నిర్వహించారు. ఈ సందర్భంగా మహిళల విశ్వాసం, ధైర్యం, సమాజం మరియు చర్చిలో వారి ప్రాధాన్యతపై ప్రత్యేకంగా దేవుని వాక్యాన్ని బోధించారు.శ్రీమతి ఎం. శ్రీలత అమ్మగారు దేవుని వాక్యాన్ని నడిపిస్తూ, కుటుంబం, చర్చి, సమాజంలో మహిళల పాత్ర ఎంతో ముఖ్యమని వివరించారు. CSI ఫార్మేషన్ డేను ప్రతి సంవత్సరం సెప్టెంబర్ 27న నిర్వహిస్తారు. 1947 సెప్టెంబర్ 27న దక్షిణ భారతదేశంలోని వివిధ ప్రొటెస్టెంట్ సంప్రదాయాల ఐక్యతతో చర్చ్ ఆఫ్ సౌత్ ఇండియా ఏర్పడిన సందర్భంగా ఈ రోజును జరుపుకుంటారు. ఐక్యత, సేవ, విశ్వాసం అనే సందేశాన్ని ప్రజల్లోకి తీసుకెళ్లడమే ఈ వేడుకల ముఖ్య ఉద్దేశ్యమని తెలిపారు.ఈ కార్యక్రమంలో రెవరెండ్ ఎం. జోసెఫ్ కిషోర్ అయ్యగారు, ప్రెస్‌బైటర్ ఇన్‌ఛార్జ్, ఆఫీస్ బేరర్లు, పాస్టోరేట్ కమిటీ సభ్యులు, మనోహరాబాద్ CSI చర్చి, మేడ్చల్ చర్చి కుటుంబ సభ్యులు పాల్గొన్నారు.

ప్రజాస్వరం,మేడ్చల్ :

మేడ్చల్ పోలీస్ స్టేషన్ పరిధిలోని ఎన్‌ఎస్‌ఆర్ కళాశాల సమీపంలో ఓ వ్యక్తి మృతదేహం లభ్యమైంది. అర్ధరాత్రి సమయంలో సదరు వ్యక్తి అకస్మాత్తుగా కుప్పకూలి పడిపోయినట్లు ఎస్సై మహేందర్ రెడ్డి తెలిపారు. సమాచారం అందుకున్న పోలీసులు ఘటనాస్థలికి చేరుకుని వివరాలు సేకరించారు. మృతుడు ఛత్తీస్‌గఢ్‌కు చెందిన కృష్ణ చంద్ర (37)గా గుర్తించినట్లు ఎస్సై వెల్లడించారు. మృతదేహాన్ని పోస్టుమార్టం నిమిత్తం తరలించి, ఘటనపై పోలీసులు దర్యాప్తు చేస్తున్నారు.

తూప్రాన్, సెప్టెంబర్ 26 (ప్రజాస్వరం ) :

ప్రతినిధి 

మెదక్ జిల్లా తూప్రాన్ పట్టణం లో నూతనంగా మంజూరైనా జూనియర్ సివిల్ కోర్టు భవనాన్ని శనివారం జిల్లా న్యాయమూర్తి నీలిమ పరిశీలించి సంతృప్తి వ్యక్తం చేసి మిగితా పనులను త్వరగా పూర్తి చేయాలనీ అదేశించారు.పనులు పూర్తియితే కోర్టు ప్రారంబం వల్ల తూప్రాన్ తో పాటు పరిసర మండలల ప్రజలకు అందుబాటులో కి వస్తుందని ఆమె అన్నారు. ఈ కార్యక్రమం తూప్రాన్ అర్డీఓ బావయ్య డిఎస్పీ నరేందర్ గౌడ్, సిఐ వెంకట రాజా గౌడ్, ఎసై గంగరాజు డీప్యూటీ తహసీల్దార్ శ్రీకాంత్ తదితరులు పాల్గొన్నారు.

నార్సింగి, సెప్టెంబర్ 26 ( ప్రజాస్వరం ) :

నార్సింగి మండల కేంద్రం లోని రైతు వేదిక లో ప్రత్యేక అధికారి నీలిమ ఆధ్వర్యంలో మండల పరిషత్ సాధారణ సమావేశం నిర్వహించారు. ఈ కార్యక్రమంలో వివిధ శాఖల అధికారులు తమ తమ శాఖలకు సంబంధించి నిర్వహించిన పనులు, భవిష్యత్తు ప్రణాళికలను వెల్లడించారు. ఈ సందర్భంగా నీలిమ మాట్లాడుతూ గిరిజన సంక్షేమ శాఖ ఆధ్వర్యంలో అన్ని కులాల నిరుద్యోగ యువతకు దాదాపు 300 ఉపాధి కోర్సులలో అన్ని వసతులు, ఉద్యోగ అవకాశాలు కల్పిస్తుందని, గ్రామ సర్పంచులు దృష్టి సారించాలని అన్నారు. ఎంపీడీఓ తిరుపతి రెడ్డి మాట్లాడుతూ గ్రామాలలో ప్లాస్టిక్ వాడకం పై దృష్టి సారించాలని, చేతి సంచులను వినియోగించేలా అవగాహన కల్పించాలని అన్నారు. గ్రామాలకు అవసరమైన భవనాలు ఇతర పనుల కు గ్రామ సభలలో తీర్మానాలు చేస్తే పై అధికారుల దృష్టికి తీసుకువెళ్లి తగిన చర్యలు తీసుకుంటామని అన్నారు. మిషన్ భగీరథ శాఖ ఏఈ స్వప్న మాట్లాడుతూ మండలానికి నీరు ముఖ్యంగా గజ్వేల్, మెదక్ సెక్టార్ నుంచి సరఫరా జరుగుతాయని తెలిపారు. సింగూరు జలాశయం లో నీటి ఎద్దడి కారణంగా రెండు నెలల వరకు మెదక్ సెక్టార్ కు నీరు సరిపడతాయని, అటుపై నీటి కొరత ఏర్పడే అవకాశాలు ఉన్నాయని అన్నారు. నీటి ఎద్దడి నివారణ చర్యల పై దృష్టి పెట్టాలని, బోర్ మోటార్ల లో నీరు వృధా కాకుండా చూసుకోవాలని అన్నారు. విద్యుత్ శాఖ ఏఈ స్వామి మాట్లాడుతూ ఎలినినో ప్రభావం వల్ల హైడ్రల్ విద్యుత్ కేంద్రాలు పూర్తి స్థాయిలో పని చేయకపోవడం వల్ల వ్యవసాయానికి 12 గం విద్యుత్ అందిస్తున్నామని, భవిష్యత్ అవసరాల కోసం సోలార్ విద్యుత్ వినియోగం పై ప్రజలకు అవగాహన కల్పించాలని అన్నారు. ఎలినినో ప్రభావం తో గోవులలో లంప్సి చర్మ వ్యాధి ప్రబలుతుందని, అన్ని గ్రామాలలో నివారణ టీకాలు వేయడం జరిగిందని తెలిపారు. మరోసారి కూడా టీకాలు వేయడం జరుగుతుందని అన్నారు. నార్సింగి సర్పంచ్ ఆకుల సుజాత మల్లేశ్ గౌడ్ ఇందిరమ్మ ఇళ్ల మలి విడత మంజూరు గురించి ప్రశ్నించగా, దసరా వరకు వెల్లడిస్తామని హౌసింగ్ ఏఈ తెలిపారు. పెద్ద తాండా సర్పంచ్ దుషాని ఛత్రియా నాయక్ తాండా లో నీటి కొరత ఉందని ఓవర్హెడ్ ట్యాంక్ నిర్మించాలని కోరగా పై అధికారులకు నివేదించి నిర్మాణం జరిగేలా కృషి చేస్తానని అన్నారు. ఈ కార్యక్రమంలో జప్తి శివునూరు, నర్సంపల్లి, శంఖాపూర్ తాండా సర్పంచులు గైర్హాజరు అవ్వగా మిగతా గ్రామాల సర్పంచులు, పలు శాఖల అధికారులు, పంచాయతీ కార్యదర్శులు పాల్గొన్నారు.